［奇文共賞］呢篇文的作者，由男性在公共交通工具張開腿這行為，推論至父權，以至女性被強姦，甚至社會弱勢族群被壓迫。老實說，我不太了解作者在寫作期間嗑了什麼，但我只能說那東西的純度一定好高，我恭喜你買到靚貨。
如果男人在公共交通工具上張開腿係父權、係會導致強姦，咁平時啲女人個死人名牌手袋成大個放在大腿上侵佔我的私人空間又點計？平時女人掃貨shopping後，拎住一袋二袋上火車乘地鐵，佔用的空間不少於男性張開雙腿，咁係咪代表女性勾結資本主義並試圖在男性的空間裡強行置入式行銷？如果該女性沒有自備購物袋，又是否等同女性向環保人士叫囂？又，如果該不是自備的購物袋裡盛載的是肉類，是否等同女性向環保兼素食團體宣戰？再講，如果啲肉唔係清真認證的，係咪女性要向環保、素食仲有穆斯林團體發動聖戰？做人唔可以咁樣無限上綱架嘛？
要是男人坐著時張開腿，就和侵犯女性脫不了關係，我想講，你唔好俾我呀媽睇到呢篇文，真係開心死佢老人家，以為佢個仔仲有機會鍾意女人，之後我返到香港日日迫我180度腿張開紮一字馬（然後開心死我老公）。我唔知道你地女權份子有幾鍾意覺得自己會被人侵犯，但我好反感嘅係，你地千方百計去搵證據證明男人天性上係會對女人有侵略性。然後，直狗偷食，孿狗當災，既然是所有男人都天生會想侵犯女性，係咪即係同性戀有得醫呀？係咪即係同性戀可以受教育而改變呀？喂呀姐，係爭取還爭取，你啪丸又好啪針都好，甚至啪啪啪都好，唔好又成日寫埋晒啲咁嘅野，搵著我地黎搞好冇？乜野都係一竹杆打一船人，咁你叫我地點幫你？你們首先必須要承認，唔係個個男人、亦唔係個個行為都代表我地想騷擾和侵犯女性。
唔好講咁遠，我講返交通工具的坐姿，比起張開腿，真正大問題的是翹腳吧？大佬，地鐵已經夠窄，你仲要翹埋隻死人腳，又阻位置又容易絆倒人，這才是應該要聲討的坐姿吧？仲有呀，嗰班留長頭髮的，在車廂內風大就成餅頭髮打落我塊臉，你覺得男人的大腿很噁心嗎？你試下講講下野，一陣風吹過來成口都係一個你唔識嘅女人的頭髮？頂，仲咸咸地架！我都覺得自己被侵犯，咁我可以點？叫所有女人每日洗頭？我未講完已經俾你地「打壓女性身體自主」釘死左啦。
最後，提提各位覺得自己好慘好可憐、每日受到壓迫的走火入魔的女權份子，現在的特首林鄭月娥係女人啦掛？佢岩岩先同記者講「取消150單程證解房屋問題說法混淆視聽」，依家係邊個壓迫緊邊個呀？佢男定女呀？唔好同我講佢係無棍嘅男人呀！其實係架，關咩男定女事姐?講父權定女權我就真係唔知，但每日150個居留權，哈，你地將來就一定有排迫，唔好話在地鐵裡張開腿，遲早人疊人添呀！繼續鬧男人啦～
奇文共賞：
https://hk.thenewslens.com/article/93315
#metoo
#問題根本不在男女之上
#是教育是公德心
#總之把過錯推給另一個性別就會很安心
#只要不是自己錯就好
#港女到一個點就會突變成劣質女權份子
#總之都係你唔岩啦
#我做就得你做就唔得
#你做咩話我喎
#你父權你壓迫女性
#咁囉
Search